第四十八回 誤中誤侯門深似海 欺複欺市道薄於雲
按：黃翠鳳當著王蓮生，即向羅子富說道：“倪個無(女每)終究是好人，聽俚閑話末好像蠻會說，肚皮裏意思倒不過實概。耐看俚，三日天氣得來飯也吃勿落。昨日耐去仔，俚一幹子來哚房間裏反仔一泡。今朝趙家(女每)下頭去，無(女每)看見仔，就搭趙家(女每)說，說我個多花勿好，說起：‘我衣裳、頭麵買俚要萬把洋錢仔，勿然，俚贖身末我想多撥點俚，故歇定歸一點也勿撥俚個哉！’我來裏樓浪，剛剛聽見，晰氣末咿好笑。難末我去搭無(女每)說說明白，我說：‘衣裳、頭麵才是我撐個物事。我來裏該搭，我個物事，隨便啥人匆許動。我贖仔身，阿好帶得去？才要交代無(女每)個（口宛）。悄然無(女每)要撥點我，勿是我客氣，謝謝無(女每)，我末一點也匆要。（要勿）說啥衣裳、頭麵，就是頭浪個絨繩，腳浪個鞋帶，我通身一塌括仔換下來交代仔無(女每)，難末出該搭個門口。無(女每)放心末哉，我一點也匆要。’陸裏曉得，倪無(女每)倒真個要分點物事撥我。俚道仔我末定歸要俚幾花哚。我說仔一點勿要，故末倪無(女每)再要快活也無撥，教我贖身末贖末哉，一千身價就一千米哉，替我看仔個好日子，十六寫紙，十七調頭，樣式樣才說好。耐說阿要快？就是我也匆可帳實概個容易。”子富聽了，代為翠鳳一喜。
蓮生不勝歎服，讚翠鳳好誌氣，且道：“有句閑話說：‘好男勿吃分家飯，好女勿著嫁時衣。’賽過就是耐。”翠鳳道：“做個倌人，總歸自家有點算計，故末好掙口氣。倘然我贖身出去，先空仔五六千個債，倒說勿定生意好勿好，我就要掙氣也掙勿來。故歇我是打好仔稿子做個事體，有幾戶客人，匆來裏上海才匆算，來裏上海個客人就不過兩戶，單是兩戶客人照應照應我，就匆要緊個哉。五六千個債也寫意得勢，我也犯勿著要俚哚衣裳、頭麵。王老爺說得好，‘嫁時衣’還是親生爺娘撥來哚囡仵個物事，囡仵好末也（要勿）著。我倒去要老鴇個物事！就要得來，碰關千把洋錢，啥犯著嗄？”蓮生仍讚不絕口。
子富卻早知贖身之後定有一番用度，自應格外周全；隻不料其如許之多；沉吟問道：“陸裏有五六千個債？”翠鳳道：“耐說無撥五六千，耐算囗：身價末一千；衣裳、頭麵開好一篇帳來裏，煞死要減省末三千；三間房間鋪鋪，阿要千把？連搭仔零零碎碎幾花用場，阿是五六千哚？故歇我就教帶得去個趙家(女每)同下頭一個相幫，先去借仔二千，付清仔身價，稍微買點要緊物事，調頭過去再說。”子富默然。
蓮生吸過四五口煙，抬身箕坐。金鳳忙取水煙筒要裝，蓮生接來自吸。
消停良久，子富方問起調頭諸事。翠鳳告訴大概：看定兆富裏三間樓麵，與樓下文君王合借；除帶去娘姨、相幫之外，添用帳房、廚子、大姐、相幫四人；紅木家生暫行租用，合意議價。又道：“十六俚哚寫紙，我末收捉物事交代無(女每)，無撥空，耐就月半吃仔台酒末哉。”子富遂麵約了蓮生，並寫了張條子請葛、洪、陳三位，令高升立刻送去。
高升趕往東合興裏吳雪香家，果然洪善卿、陳小雲為阻雨未散。看過條子，葛仲英先道：“我隻好謝謝哉，一笠園約定來浪。”小雲亦以此約為辭。止有善卿準到，寫張回條，打發高升複命。卻聽窗外雨聲漸漸停歇，涼篷上點滴全無，洪善卿遂蹈隙步行而去。
小雲從容問仲英道：“倌人叫到仔一笠園，幾日天住來浪，算幾花局嗄？”仲英道：“看光景起，園裏三四個倌人常有來浪，各人各樣開消。再有倌人自家身體，喜歡白相，同客人約好仔，索性花園裏歇夏，故也隻好寫意點。”小雲道：“耐阿是帶仔雪香一淘去？”仲英道：“有辰光一淘去。到仔園裏再叫也無啥。”小雲自己盤算一回，更無他話，辭別仲英，徑歸南晝錦裏祥發呂宋票店。
明日，陳小雲親往拋球場相熟衣莊，揀取一套簇新時花淺色衫褂，複往同安裏金巧珍家給個信。巧珍一見，問道：“耐陸裏去認得個齊大人？”小雲道：“就昨日剛剛認得。”巧珍道：“耐搭俚做仔朋友末，倪要到俚花園裏白相相去。”小雲道：“明朝就請耐去白相，阿好？”巧珍道：“故歇客客氣氣算啥嗄？”小雲道：“明朝是一笠園中秋大會，鬧熱得野哚！我末去吃酒；耐要白相，早點舒齊好仔，局票一到末就來。”巧珍自是欣喜。當晚小雲、巧珍暢敘一宿。
到了八月十五中秋節日，陳小雲絕早起身，打扮修飾，色色停當，鍾上剛敲八點，即催起金巧珍，叮囑兩句。小雲趕回店內，坐上包車，望山家園進發。